മള്ളിയൂർ ഗണപതി  | കവിതകൾ | കുറുങ്കവിതകൾ  | കുറ്റിപ്പെൻസിൽ | Kuttipencil Malayalam

ഏകദന്തനായ് മള്ളിയൂർ വാണിടും

ലോകനായകാ! ശ്രീ ഗണേശാ! നമോ

ബുദ്ധികാരകാ! സിദ്ധിവിനായകാ!

വൃദ്ധിയേകണേ വിദ്യാധിസിദ്ധിയിൽ

കണ്ണിനാനന്ദമേകുന്ന ഭാവമോ-

ടുണ്ണിയായൊരു കണ്ണനെ ലാളിക്കും.

എണ്ണിയാലൊടുങ്ങാത്തതാം വൈഭവം

തിണ്ണമെന്നെയും കാട്ടിത്തരേണമേ.

തത്ത്വബോധമേകുന്ന പുരാണവും

ചിത്തചോരനാം കണ്ണനോടോതുന്നു.

അത്തലാറ്റിടും നിന്റെയാ ഭാഷണം

നിത്യമെന്നുടെ ചേതസി പുൽകണം.

ഇഷ്ടഭോജ്യമാം മോദകം തന്നിടാം

കഷ്ടകാലമൊടുക്കണേ സത്വരം

ശിഷ്ടകാലവും നാമസങ്കീർത്തനം

തുഷ്ടിയോടെ ഭജിക്കുവാനാകണേ.

രചന: ഗീതാദേവി