മഹാവിഷ്ണു | കവിതകൾ | കുറുങ്കവിതകൾ  | കുറ്റിപ്പെൻസിൽ | Kuttipencil Malayalam

പാലാഴിതന്നിലമരും യശസ്വിയായ്

പാലിച്ചുപോറ്റുമഖിലം ചരാചരം

മാലാകെ മാറ്റിടുമൊരാത്മബന്ധു! നിൻ

ലീലാവിലാസമതു കൂപ്പിടാം ഹരേ!

 

ധർമ്മം പുലർത്തുമതിനിഷ്ഠയോടെ,യ

ധർമ്മം ഹരിക്കുമതുതാൻസ്വധർമ്മവും

മുപ്പാരിലും പരമരക്ഷയേകിടും

തൃപ്പാദമെന്നുമടിയന്നൊരാശ്രയം

 

പീതാംബരേശ്വര ! ദശാവതാരവും

ജാതാദരം മനസി വാഴ്ത്തിടുന്നിതാ

ഗീതാമൃതം ചൊരിയുമാദിരൂപനും

സീതാപതിക്കുമരുളുന്നു വന്ദനം.

 

നാരായണാ! തവ പദാംബുജം തൊഴാം

വാരേണ വന്നിടണമെന്റെ മാനസേ

ചേരേണമാ പദസരോജതാരിലായ്

പാരാതെ തന്നിടുക ദേഹമുക്തിയും

(വൃത്തം: ലളിത)

ലക്ഷണം:തം ഭം ജരങ്ങൾ ലളിതാഖ്യവൃത്തമാം

രചന: ഗീതാദേവി